თბილისის მერიის ინიციატივით, 2018 წლის ბოლოდან, მცირე და საშუალო ბიზნეს სექტორისთვის ბიზნეს აქსელერატორი ამოქმედდება. თბილისში რეგისტრირებულ ან მომუშავე ყველა კომპანიას საშუალება ექნება, აქსელერატორს უფასო სამუშაო სივრცეებით უზრუნველყოფის, კონსულტაციის გაწევის, ფინანსური ანგარიშგებების, საგადასახადო კანონმდებლობისა და ადამიანური რესურსების მართვასთან დაკავშირებულ, მათ შორის, იურიდიულ და ბრენდის პოზიციონირების საკითხებზე მიმართოს. შეიქმნება ვებგვერდი, სადაც მეწარმეები დარეგისტრირებას შეძლებენ.
მეწარმეებს ასევე ექნებათ ვალდებულება, ერთი თვის ვადაში, საკუთარი ბიზნესის კონცეფცია წარმოადგინონ, რომელთაგანაც საუკეთესო ბიზნეს მოდელების შერჩევა და შესაბამისი მომსახურების გაწევა მოხდება.

პროექტის ფარგლებში, სიცოცხლისუნარიან და წარმატებულ 100-ზე მეტ კომპანიას აქსელერატორი შეუქმნის ვებგვერდებს, შეუდგენს ბიზნესგეგმასა და შესაძლო პარტნიორებთან შემდგომ ადვოკატირებას გაუწევს. პროგრამის ფარგლებში, მეწარმეებისთვის 30-მდე გამოფენა-გაყიდვაც მოეწყობა.

პროგრამის განხორციელების შედეგად აქსელერატორმა უნდა უზრუნველყოს დაგეგმილი რაოდენობის ბიზნესგეგმების მომზადება, შესაბამისი სტარტაპების იდენტიფიცირება და გამორჩეული ბიზნეს იდეების სიცოცხლისუნარიანობის უზრუნველყოფა. აუცილებელია, რომ შედგენილი ბიზნესგეგმების ნაწილმა მოიპოვოს დაფინანსება ფინანსური და სხვა ინსტიტუტებისაგან, რაშიც შეძლებისდაგვარად დაეხმარება თბილისის მერია. თბილისის აქსელერატორი ითამაშებს მნიშვნელოვან როლს სტარტაპების ახალბედა ეკოსისტემის განვითარებაში.

პროექტის დასაწყის ფაზაში თბილისის მერიამ გადადგა სამი ნაბიჯი: 1) დააკორექტირა და ხელახლა დაამტკიცა პროექტის ბიუჯეტი; 2) შეარჩია აქსელერატორის მდებარეობა და შენობა; 3) დანიშნა პროექტის კოორდინატორი და დამხმარე გუნდი. ამ ფაზას დასჭირდა დრო 2008 წლის იანვრიდან აგვისტომდე.
პროექტის მეორე ფაზა მოიცავს მოსამზადებელ სამუშაოებს აქსელერატორის სივრცის გახსნისა და ამოქმედებისათვის. განსახორციელებელია შესყიდვები და მცირე სარემონტო სამუშაოები, დასაკომპლექტებელია სრული სამუშაო გუნდი და გასაშვებია პროცესის სამართავი ვებ-პლატფორმა.