ევროკავშირი მხარს უჭერს სასამართლოს დამოუკიდებლობას, მიუკერძოებლობასა და ანგარიშვალდებულებას და ხელს უწყობს საქართველოში კორუფციისა და ორგანიზებული დანაშაულის წინააღმდეგ ბრძოლას. ევროკავშირმა საქართველოს სასამართლო სისტემის რეფორმასა და ანტიკორუფციული მექანიზმების გაძლიერებას ფინანსური და ტექნიკური დახმარება გაუწია.
ევროკავშირი საქართველოში ადამიანის უფლებების აქტიური დამცველია და ახორციელებს ისეთ ინიციატივებს, რომელიც მიმართულია დისკრიმინაციისა და სიძულვილის ენის წინააღმდეგ, გენდერული თანასწორობისა და სოციალური ინტეგრაციის ხელშეწყობისა და უმცირესობებისა და ყველაზე დაუცველი ჯგუფების უფლებების დაცვისკენ.
ოჯახური ძალადობის წინააღმდეგ ბრძოლისა თუ დანაშაულის პრევენციის მიზნით, ევროკავშირი თანამშრომლობს სამოქალაქო საზოგადოებასთან და საერთაშორისო ორგანიზაციებთან უფრო უსაფრთხო და მდგრადი საზოგადოების ჩამოსაყალიბებლად. ევროკავშირი მუშაობს სკოლების უსაფრთხოების გაუმჯობესებაზე, ნარკოტიკების მოხმარების პრევენციასა და ნარკოტიკების მომხმარებლების რეაბილიტაციაზე, აგრეთვე ანგარიშვალდებულების გაძლიერებაზე.
ევროკავშირი, საქართველოში აქტიური და ინფორმირებული საზოგადოების ჩამოყალიბების მიზნით, მედიის თავისუფლებისა და განვითარების, აგრეთვე მედიაწიგნიერების დონის ამაღლების ურყევი მხარდამჭერია. ევროკავშირი ეხმარება დამოუკიდებელ მედიასაშუალებებს, მხარს უჭერს რა გამოხატვის თავისუფლებას, იცავს ჟურნალისტების უფლებებს და ახალგაზრდებსა და მასწავლებლებს დეზინფორმაციის უკეთ ამოცნობის უნარ-ჩვევებს უვითარებს.
სამოქალაქო საზოგადოება დემოკრატიულ პროცესებში, მათ შორის საქართველოს ევროკავშირში ინტეგრაციის გზაზე, უმნიშვნელოვანეს როლს ასრულებს. ევროკავშირი სამოქალაქო საზოგადოების ორგანიზაციების ურყევი მხარდამჭერია. იგი აფინანსებს და ტექნიკურ დახმარებას უწევს სამოქალაქო საზოგადოების ორგანიზაციებს, რომლებიც მუშაობენ ისეთ საკითხებზე, როგორიცაა ადამიანის უფლებები, გამოხატვის თავისუფლება, სამოქალაქო განათლება და ადვოკატირება.
ევროკავშირი მტკიცედ უჭერს მხარს საქართველოს მოქალაქეებს დემოკრატიისა და ევროკავშირისაკენ მათ სწრაფვაში.
