ევროკავშირი პატივს სცემს და ხელს უწყობს საქართველოს უნიკალურ კულტურას. კერძოდ, ის საქართველოს კულტურული მემკვიდრეობის შენარჩუნებაში, კულტურული ფასეულობებისა და ტრადიციების ხელშეწყობასა და დაცვაში და შემოქმედებითი დარგის განვითარებაში ეხმარება.   2015 წლიდან საქართველო მონაწილეობს ევროკავშირის პროგრამაში  „შემოქმედებითი ევროპა“, რომელიც მხარს უჭერს კულტურული, შემოქმედებითი და აუდიო-ვიზუალური დარგების განვითარებას. პროგრამის მიმდინარე ფაზა მიზნად ისახავს საინფორმაციო მედიისა და ინოვაციური ტექნოლოგიების გამოყენების მხარდაჭერას, აგრეთვე მედიისა და აუდიო-ვიზუალური დარგების მდგრადობის გაძლიერებას.

ევროკავშირი ტრადიციების დაცვის მიმართულებით საქართველოს იმ მცირე მეწარმეების მხარდაჭერითა და შესაძლებლობების შექმნით ეხმარება, რომლებიც ტრადიციულ ნაწარმს და ხელნაკეთობებს ქმნიან. ის ადგილობრივ მეწარმეებს ევროპელ კოლეგებთან თანასწორად ვაჭრობის მიზნის მიღწევაში ეხმარება. კერძოდ, ევროკავშირი აფინანსებს აღჭურვილობას, სტანდარტების დანერგვას, სასწავლო კურსებს და იმ სხვა პროცესებს, რომლებიც მცირე მეწარმეებს კულტურული ტრადიციების შენარჩუნებასა და, ამავე დროს, შემოსავლის მიღებაში ეხმარება. ევროკავშირის დახმარებით მწარმოებლები საკუთარ თემებში სამუშაო პირობებს აუმჯობესებენ და ადგილობრივ მომხმარებლებს უკეთესი ხარისხის მომსახურებასა და პროდუქტებს სთავაზობენ.

გარდა ამისა, ევროკავშირს საკუთარი წვლილი შეაქვს საქართველოს შემოქმედებითი სექტორების მდგრად განვითარებასა და ამ მიმართულებით სამუშაო ადგილების შექმნაში. კერძოდ, ის ხელს უწყობს დარგის პოტენციალის გაძლიერებას, ქმნის თანამშრომლობის შესაძლებლობებს და უზრუნველყოფს დაფინანსებას საქართველოს რეგიონებზე განსაკუთრებული აქცენტით.