ევროკავშირი არის სასამართლოს დამოუკიდებლობის განმტკიცების, კორუფციის წინააღმდეგ ბრძოლისა და სახელმწიფო უწყებების ანგარიშვალდებულების უზრუნველყოფის ურყევი მხარდამჭერი კანონის უზენაესობის, როგორც დემოკრატიის ერთ-ერთი მთავარი საყრდენის, გაძლიერების მიზნით. ევროკავშირმა ფინანსური და ტექნიკური დახმარება გაუწია სასამართლო სისტემის რეფორმას, ანტიკორუფციული მექანიზმების განმტკიცებასა და სამართალდამცავი ორგანოების შესაძლებლობების გაძლიერებას. ევროკავშირი ასევე ხელს უწყობს სასამართლო სისტემას, აღმასრულებელ ხელისუფლებასა და სამოქალაქო საზოგადოებას შორის დიალოგსა და თანამშრომლობას ურთიერთკონტროლისა და დაბალანსების სათანადო სისტემის შესაქმნელად.

ევროკავშირი საქართველოში ადამიანის უფლებების აქტიური დამცველია. იგი აგრძელებს დისკრიმინაციის წინააღმდეგ მიმართული ინიციატივების მხარდაჭერას, გენდერული თანასწორობის ხელშეწყობას და უმცირესობებისა და მოწყვლადი ჯგუფების უფლებების დაცვას. ევროკავშირი ადამიანის უფლებათა დამცველებს უტარებს ტრენინგებს იურიდიულ და ადვოკატირების საკითხებში და ეხმარება საქართველოს მთავრობას ადამიანის უფლებათა დაცვის კუთხით ქვეყნის მიერ ნაკისრი საერთაშორისო ვალდებულებების შესრულებაში.

ევროკავშირი აქტიურად მუშაობს საქართველოსთან უსაფრთხო საზოგადოების ჩამოყალიბების მიმართულებით, რომელიც მოიცავს სამოქალაქო საზოგადოებასთან მუშაობას სკოლებში უსაფრთხოების გაძლიერების, ნარკომანიის პრევენციისა და ნარკოტიკების მომხმარებლების რეაბილიტაციის კუთხით, რაც უზრუნველყოფს უფრო მდგრადი და უსაფრთხო საზოგადოების ჩამოყალიბებას. ევროკავშირი აგრეთვე თანამშრომლობს სხვა საერთაშორისო ორგანიზაციებთან უსაფრთხოების სექტორში ანგარიშვალდებულებისა და ადამიანის უფლებების გაძლიერების მიზნით, რაც ხორციელდება ზედამხედველობის გაუმჯობესების, უფრო სრულყოფილი კვლევების ჩატარებისა და ოჯახში გენდერული ნიშნით ძალადობაზე ყურადღების გამახვილების გზით.

ევროკავშირი საქართველოში აქტიური და ინფორმირებული საზოგადოების ჩამოყალიბების მიზნით მედიაწიგნიერების, თავისუფლებისა და განვითარების ურყევი მხარდამჭერია. ევროკავშირი ფინანსურ და ტექნიკურ დახმარებას უწევს დამოუკიდებელ მედიასაშუალებებს, ხელს უწყობს მედიაწიგნიერების კამპანიების ჩატარებას და მხარს უჭერს მედიის თავისუფლებისა და პლურალიზმის გაძლიერებას გამოხატვის თავისუფლების უზრუნველსაყოფად. ევროკავშირი გმობს და ეწინააღმდეგება მედიაში ჩარევას და იბრძვის საქართველოში ჟურნალისტების დაცულობისა და უსაფრთხოებისათვის.

სამოქალაქო საზოგადოება დემოკრატიულ პროცესებში სასიცოცხლოდ მნიშვნელოვან როლს ასრულებს. ევროკავშირი საქართველოს სამოქალაქო საზოგადოების ორგანიზაციების მტკიცე მხარდამჭერია. იგი უზრუნველყოფს ფართო სპექტრის საკითხებზე მომუშავე ორგანიზაციების როგორც ფინანსურ, ისე ტექნიკურ დახმარებას, მათ შორის, ადამიანის უფლებების, სამოქალაქო განათლებისა და ადვოკატირების სფეროებში. ცხრა პუნქტის შესაბამისად, ევროკავშირი აქტიურად უწყობს ხელს სამოქალაქო საზოგადოების ორგანიზაციებსა და სახელმწიფო უწყებებს შორის დიალოგის წარმოებას პოლიტიკის შემუშავების პროცესში სამოქალაქო საზოგადოების ჩართულობის უზრუნველსაყოფად.