ევროკავშირმა გარემოს დაცვა და კლიმატის ცვლილებასთან ბრძოლა საკუთარ პრიორიტეტად აქცია ევროპული მწვანე შეთანხმებისა და სხვა ისეთი ინიციატივების შემუშავების შედეგად, როგორიცაა სოფლის მეურნეობის საერთო პოლიტიკის რეფორმა. კლიმატის ცვლილების შედეგების წინააღმდეგ ბრძოლის პარალელურად, ევროკავშირის მიერ მხარდაჭერილი რეფორმები საქართველოს ევროკავშირის გარემოსდაცვით მოთხოვნებსა და სტანდარტებთან აახლოებს და გარემოს უკეთ დაცვას უზრუნველყოფს. ყოველივე ზემოაღნიშნული საქართველოს მოქალაქეების ცხოვრების ხარისხსა და ჯანმრთელობის მდგომარეობას გააუმჯობესებს.
ეკონომიკური და საინვესტიციო გეგმის (EIP) მეშვეობით ევროკავშირი აქტიურად მუშაობს საზოგადოებრივი შენობების ენერგოეფექტურობის გაუმჯობესებაზე, რაც ხელს უწყობს ენერგიისა და ფინანსური რესურსების დაზოგვას და შენობებში სითბოს შენარჩუნებას. ევროკავშირი ასევე ხელს უწყობს საქართველოში განახლებადი ენერგიის გამომუშავებას, რაც არა მხოლოდ საქართველოს ენერგეტიკულ უსაფრთხოებას გააძლიერებს, არამედ შეამცირებს ენერგეტიკული სექტორის უარყოფით ზემოქმედებას გარემოზე. ევროკავშირმა დიდი წვლილი შეიტანა ძირითადი ჰიდროელექტროსადგურების მოდერნიზებაში და საქართველოს კავკასიის მასშტაბით პირველი კომერციული ქარის ელექტროსადგურის მშენებლობაში დაეხმარა. ევროკავშირი აგრძელებს სარემონტო სამუშაოების დაფინანსებას ენგურის ჰიდროელექტროსადგურის მიმდებარედ, რომელიც საქართველოში მოხმარებული ელექტროენერგიის დაახლოებით 40%-ს აწარმოებს. EIP-ის ფარგლებში ერთ-ერთ წამყვან პროექტს წარმოადგენს თბილისში ჰაერის ხარისხის გაუმჯობესების პროექტი, რომელიც სარგებელს 1 მილიონზე მეტ ადამიანს მოუტანს.
გარემოს დაცვისა და კლიმატის მიმართულებით ევროკავშირი საქართველოს ასევე ეხმარება ნარჩენების მართვის გაუმჯობესებაში, წყლის სექტორის რეფორმირებაში, გარემოსა და ჯანმრთელობაზე ზემოქმედების შეფასებების ჩატარებასა და ბიომრავალფეროვნების დაცვაში. ევროკავშირი მიზნად ისახავს სამრეწველო დაბინძურებისა და საფრთხეების მართვის და კანონმდებლობის გაუმჯობესებას და განსაზღვრავს გარემოსდაცვითი რისკების მართვის მექანიზმებს.