ევროკავშირის მიერ დაფინანსებული ეს პროექტი, რომელიც 36 თვის განმავლობაში განხორციელდება აღმოსავლეთ პარტნიორობის რეგიონში, წარმოადგენს ადრე განხორციელებული საქმიანობის II ფაზას. პროექტის მიზანია ორგანიზებული დანაშაულის წინააღმდეგ ბრძოლა და მასთან დაკავშირებული პრობლემების მოგვარება, განსაკუთრებით აქტივების აღდგენის მექანიზმების (როგორც სისხლისსამართლებრივად დასჯადი, ისე არა-დასჯადი) გაძლიერების გზით. პროექტში ჩაერთვებიან ეროვნული დონის უწყებები, როგორიცაა მაგალითად, იუსტიციის სამინისტროები, გენერალური პროკურატურა, აქტივების აღდგენის (და მართვის) ოფისები და ფინანსური დაზვერვის განყოფილებები. ტექნიკური დახმარების ტიპიური მაგალითები მოიცავს კვლევას, პოტენციალის განვითარებას, სასწავლო მივლინებებს, სამუშაო ჯგუფების შეხვედრებს, ასევე ტექნიკურ კონსულტაციებს და მენტორობას მიმდინარე სასამართლო საქმეებზე.

ამ ინიციატივის ზოგადი მიზანია სომხეთის, აზერბაიჯანის, საქართველოს, მოლდოვის და უკრაინის უწყვეტი მხარდაჭერა აქტივების აღდგენის თანამედროვე პოლიტიკის და პრაქტიკის მდგრად დანერგვაში და ოპერატიული ღონისძიებების განხორციელების ხელშეწყობა ორგანიზებული დანაშაულიდან მიღებული შემოსავლების აღდგენის პროცესში; გარდა ამისა, ინოვაციური და მაღალტექნოლოგიური მხარდაჭერის უზრუნველყოფა მზარდ ორგანიზებულ კრიმინალურ აქტივობასთან საბრძოლველად, რომელიც გავლენას ახდენს აღმოსავლეთ პარტნიორობის რეგიონზე, და საბოლოო ჯამში ასევე ევროკავშირის წევრ სახელმწიფოებზე.

1. შესაბამის თანამდებობის პირებს ეროვნულ დონეზე ექნებათ შესაძლებლობა გაიგონ მეტი პოლიტიკასთან დაკავშირებული მოწინავე, თანამედროვე პრაქტიკის შესახებ, რომელიც აუმჯობესებს ორგანიზებულ დანაშაულთან ბრძოლის შედეგებს და უკანონოდ შეძენილი აქტივების ამოღების ეფექტიანობას (და ამ აქტივების ეფექტიან მართვას);
2. ოფიციალურ პირებს აღმოსავლეთ პარტნიორობის რეგიონში გაეწევათ უაღრესად სპეციალიზებული კონსულტაციები და შესაბამისი მხარდაჭერა იმის თაობაზე, თუ როგორ უნდა წარიმართოს მიმდინარე სასამართლო საქმეები, რომლებიც ორგანიზებულ დანაშაულთან დაკავშირებული აქტივების მიკვლევას და აღდგენას უკავშირდება.