მცირე და საშუალო ზომის საწარმოები საქართველოს ეკონომიკის ხერხემალია. ისინი ბიზნესის 95%-ს და დასაქმების 60%-ზე მეტს ქმნიან და შესაბამისად სამუშაო ადგილების შექმნისა და ეკონომიკური ზრდის დიდი პოტენციალი გააჩნიათ. პანდემიასთან ბრძოლაში საქართველოს დასახმარებლად ჩვენს მიერ მობილიზებული 1.5 მილიარდი ლარის მნიშვნელოვანი ნაწილი სწორედ მცირე და საშუალო ბიზნესის დახმარებას ითვალისწინებს.
2019 წელს, EU4Business–ის ფარგლებში, ევროკავშირის დაფინანსებით, საქართველოში სულ 47 პროექტი განხორციელდა, რომელთა საერთო ბიუჯეტი 328 მილიონ ევროზე მეტია, საიდანაც 75.89 მილიონი ევრო უკვე გაცემულია. ეს მხარდაჭერა ხორციელდება ჩვენს პარტნიორ ორგანიზაციებთან ერთად, მათ შორის ევროპის რეკონსტრუქციისა და განვითარების ბანკთან (EBRD) და ევროპის საინვესტიციო ბანკთან (EIB) თანამშრომლობით. ევროკავშირისა და პარტნიორების მიერ ინვესტირებული თანხებით ქვეყანაში დამატებითი სესხებისა და ფინანსური დახმარების მობილიზება გახდა შესაძლებელი. ევროკავშრის მხარდაჭერით 36,000-ზე მეტმა მცირე და საშუალო ბიზნესმა ისარგებლა, რის შედეგადაც 31,000-ზე მეტი ახალი სამუშაო ადგილი შეიქმნა და 414 მილიონზე მეტი ევროს დამატებითი შემოსავლის გენერირება მოხდა. ევროკავშირის ამ პროექტების რაოდენობა მზარდია, რადგან EU4Business კვლავ აგრძელებს მუშაობას საქართველოში.
გლობალური პანდემიის ფონზე, მცირე და საშუალო საწარმოები, საქართველოშიც ურთულესი გამოწვევების წინაშე აღმოჩნდნენ. ამ კრიზისულ პერიოდში, EU4Business-ის პროგრამა მცირე ბიზნესს გვერდში დაუდგა, მათ შორის გამკაცრებულ რეგულაციებთან და ბაზრის ახალ მოთხოვნებთან ადაპტაციაში, ასევე სამუშაო ადგილების შენარჩუნებისა და შეზღუდული რესურსებით ბიზნესსაქმიანობის გაგრძელების პროცესში. საქართველოში Covid-19-თან დაკავშირებული ბიზნესის მხარდამჭერი პროგრამების შესახებ დამატებითი ინფორმაციისთვის ეწვიეთ სპეციალურ საინფორმაციო პლატფორმას EU4Business_Covid-19.
თუ როგორ მუშაობს EU4Business საქართველოში და როგორ ეხმარება მცირე და საშუალო ბიზნესს კორონავირუსის შედეგად შექმნილი ეკონომიკური გამოწვევების დაძლევაში გაიგეთ ჩვენი გმირების ისტორიებიდან.
#Stronger Together #EU4Georgia #EU4Business
